« March 2024 »
MoTuWeThFrSaSu
 123
45678910
11121314151617
18192021222324
25262728293031
Monday 01st November 2004 01:35:01 AM

29/11/2004 - [ 一 ]

預計到呢個禮拜會好快過~ 因為今日 biochem 都教晒書啦~ IT, Lang, micbio lab, 都搞掂晒啦~ 差 micbio 未搞掂ja~ 今晚一定要通霄寫起個 BMS paper 啦~ 一定唔可以拖太耐...... 因為星期四就係 micbio lab exam, 俾多D時間去溫 micbio lab 仲好啦~

 

適當o既時候做適當o既野...... 但係咩叫適當呢???



28/11/2004 - [ 日 ]

今日嘗試去了解成個 D major o既指法係點, 諗住咁樣會對我拉 D major o既歌方便好多, 不過寫寫下 notes 發覺我對所謂o既樂理真係弱到無論..... 好多好似好基本o既野都好唔清楚...... 唔...... 不過而家唔驚, 因為有咩唔明可以走去問 Cindy~ ccc, 而家好似有乜音樂o既問題都可以問佢咁~

 

micbio presentation D 資料都搵得差唔好多啦, 今晚打做 word 俾D組員等佢地聽日整合埋一齊就得啦~ 今晚仲要寫下份 bms paper 添~ 但係我仲想溫埋 biochem 喎~ 夠唔夠時間呢?

 



27/11/2004 - [ 六 ]

今日靜靜地咁聽下音樂, 溫下書, 咁就過左一個下午~ 幾舒服, 而且溫書果度都幾有效率~ 天氣凍D, 我真係會集中D架~

 

尋日 Cindy 教左我三把位o既A同E o既指法, 今日即刻練左成個幾鐘琴, sure 左D音應該係點之後, 果然拉得又再順D啦! 我真係覺得係時候試下拉 pachelbel canon 27到37個 bar 啦~ mark 好D指法之後應該應付得黎ge~ 多謝 Cindy 呀~ 個個禮拜都可以學到新野~ 正!

 

見到對面海o既燈飾都著左一半啦~ 聖誕節好快就到啦~ 總係令人非常期待o既節日.....



26/11/2004 - [ 五 ]
放左學之後去左沙田大會堂睇阿昇做 drama, city drama soc o既 freshman performance~ 個 show 算係咁啦~ 反而我係最留意人地點打燈, 發覺燈光角度o既運用, 真係好影響個整體畫面o既氣氛~ 室內人像..... 或者燈光設計比攝影技巧更重要~ 當然點樣用光都係攝影o既一大學問啦~


25/11/2004 - [ 四 ]
尋晚沖完涼, 正諗住開波作文之際, 嚇然發現一大隻四腳爬爬好開心咁停左o係衣櫃上面!!! 係四腳爬爬呀!!! 呢個世界上最得人驚o既生物呀!!! 第一眼見到佢我已經即刻彈開三尺, 平時見到小強基本上搵野了下佢佢就會好快走開, 但因為呢隻四腳爬爬實在太太太樣衰啦, 我行埋去都想嘔...... 咁唯有搵野掟埋佢附近嚇走佢啦, 但又唔想掟死佢...... 始終佢都無得罪我...... 無理由要佢死得咁慘...... 佢只不過樣衰D咁行過je...... 但係唔知佢係瞓左定係點, 竟然對我o既投擲攻擊毫無反應...... o係極度無奈之下, 我唯有o係極度恐懼之下作文啦...... 雖然好努力咁嘗試覺得佢其實唔係咁樣衰, 不過每一次望佢一眼我都已經起晒雞皮...... 作左一半發覺真係頂唔順...... 好彩我張床同個衣櫃o岩o岩對住, 都有一段距離, 就係咁我逼自己瞓覺, o係醒下瞓下o既情況下, 到左天光左右, 佢終於走左啦, 我終於瞓得著...... 實狂太恐怖o既一晚...... 第時 animal physiology 千期唔好要我解剖四腳爬爬, 我真係會死架...... 佢俾我太多童年陰影啦......


24/11/2004 - [ 三 ]

今日去尖沙咀通利睇過D小提琴 case, 睇到一個好靚o既, 問完幾錢之後即刻無野講..... 成$3xxx囉...... 個 case 同我隻琴差唔多價...... 無ge, 個 case 用料好, 仲有埋個濕度計, 超勁~~~ 算啦, 聽日去其他琴行問下有無平D啦...... 仲以為幾舊水就ok添...... 完全估佢唔到囉~

 

終於o係學校借到 lord of the rings the return of the king 啦~ 超正! 比上集有過之而無不及呀! 鏡頭同特技都係無可挑剔! 靚到震~ 等 sem break 果時一定要搵日一次過睇晒3集!!

 

呢幾日成日覺得自己好多野要做, 但又好似無乜做過野...... shit......



23/11/2004 - [ 二 ]

可惡呀! 原本我尋日考左 oral, 星期四就無堂可以試下 dayoff o既感受啦, 不過又一次因為 follow lab 而無左呢個機會...... 忍...... 唯有 fellow lab 之後去石硤尾影相啦~ 比賽要交相啦~

 

PE 考晒D practical 啦~ 好野~ 唔洗煩啦~ 下堂番去 hae 下, 再下堂上埋堂理論堂(pe都有!!?)就收皮啦! pe basketball 比想像中無咁好玩......

 

Eric approve 左我個 BMS topic 啦~ 而我都搵到D資料可以用啦~ 聽日就開波寫啦!

 

今日 U-forum 有 HKPO, 幾正喲! 有免費 concert 聽! 個 ac hall D聲有D怪...... 後面D銅管D聲有D over左o既感覺~ 不過整體幾好~ 最正係今日可以好留心咁睇手~ 好驚訝佢地點解可以好輕鬆咁拉一抽音符......

 

今日練琴有新進展呀! 轉把位果時順左D呀! 原來為左 keep 住個拍子, 係要o係心入面唱住個 melody 先跟得到架! 咁D手指就可以順暢D咁禁落去架啦~ 開心~

 

(今日篇日記做乜變左 point form!??)



22/11/2004 - [ 一 ]

今日終於可以開始 triacylglycerol metabolism o既 biochemical pathway 大整合啦~ 漸漸可以睇到個 gerneral structure 係點啦~ 只要再記熟D intermediate 就可以好流暢咁遊走於呢堆 pathway 啦~ 加油!!!

 

我拉 pachebel canon o既最大問題始終係轉把位果度. 唔知係我基本功唔夠好定係其他問題, 拉左咁耐仍然係拉到一舊舊...... 拉極都拉得唔夠順. 呢幾日已經改左小小夾琴o既姿勢, 不過仲係差D野, 到底係咩呢???

 

BMS 份 paper 諗到個 topic 啦~ "近20年10-30歲年輕人因心臟病死亡概論", 聽日睇下如果有足夠資料o既話就可以開波~ 1000字, 以一份黎講唔算太多啦~



21/11/2004 - [ 日 ]

今日o既系際排球比賽都係玩票性質啦~ 一來無乜點夾, 二兩我地玩開排球o既人唔多~ 今日對住 china study, 佢地有個校隊o既人, 基本已經殺晒~ 不過都玩得幾開心呀~ 掂番個排球,  feel good~~~

 

打完波去左藍田幫梁偉個 friend 影跆拳道比賽, 唔識影 sport o既野...... 都係影左一堆交差相, 始終影 sport 器材幾緊要, 仲要對果樣運動有一定認識, 而且反應要好快, 我3樣都無, 所以理所當然影唔到D咩野啦~ 對影 sport 興趣不大......

 

今日先發現左我小提琴 case 幾殘下, 我諗係時候買個好小小o既 case 啦~



20/11/2004 - [ 六 ]
今日好 free 咁拉下琴, 好開心o既感覺~ 久違左o既感覺喲!


19/11/2004 - [ 五 ]

無驚無險咁過左個英文 presentation, 又順順利利咁 upload 左個 it homepage, 好野~ 計埋 exam, 得番7個大工程~ 希望都可以順利啦!

 

今日勁開心呀! 因為終於搵到拉小提琴o既同學仔啦~ Cindy 原來係高手黎架! 而且阿兢都想學琴~ 又有人教, 又有人陪~ 學琴o既衝勁完全番晒黎啦~ 超超開心呀!!! 雖然仲未學D咩, 但係就已經要多謝 Cindy 啦~



17/11/2004 - [ 三 ]

呵~ 除左機構果 part 之外, 已經搞掂 it 個網啦~ 聽日 follow lab 之後有2個鐘時間可以搞埋機構果 part 啦~ 應該可以o係星期五 submit 到啦~ 而聽日就係英文 presentation, 要準備o既都準備好啦, 等死咁啦! 搞完呢兩個 project 之後, 跟住就可以開始寫 BMS 份 paper 啦~ 而且亦係時候開始埋首溫習啦~ 第一科 micbio lab writen exam 02/12/2004 好快就到, 其他 exam 都得番唔夠一個月lu~

 

呢兩日天氣幾涼下, 幾舒服下~ 不過要記得早D沖涼, 下下1,2點先沖就真係幾凍下~ 病左就唔好啦~

 

靚到咁, 唯有當係藝術品咁欣賞啦~ 眼看手勿動喲~



16/11/2004 - [ 二 ]

每次溫完 biochem, 都有種要贊頌天地之美o既感覺...... 點解D他嗎的亂七八糟o既 biochemical pathway 可以好神奇咁連埋一齊架!? 太勁, 太好玩啦啦啦啦啦啦.............!!!

 

yeah~ 前日影落D相今日終於執完啦~ 執到3張正野啊! 最正果張竟然係客串o既男 model makr2 師兄! 估唔到我影男人都有一手喎~ 哈, 邊果如果想影寫真可以搵我, 唔收錢點話~ XDDDD~~~ 而 maggie 同 bee 果2張清新感覺, 加埋上次三文魚果張, 可以另開一個相簿仔喲! 以後都幫每一個 model 影一張~ 不過其實今次係想影秋天感覺o既 maggie, 不過反而影阿bee果時出到呢種感覺...... 有時影相就係咁奇怪......

http://www.fotop.net/nicolo/mark2/mark20001



15/11/2004 - [ 一 ]

或許只是小小的改變

都可變更美麗

不明所以的感覺

只需一眼

像活在夢中

但夢醒了

心仍在痛

思海仍在迴盪

影子仍在漣漪上起伏不定

像季節

像妳的心

然而幻變的天空最使人沉醉

 

011316112004 羊



14/11/2004 - [ 日 ]

今日從頭痛中解脫, 感謝...... 跟手就走左去影想, 個太陽好晒, 不過o岩晒我, 晒死D感冒菌~ 出完一身汗, 真係舒服好多~

 

第二次影會活動~ 好玩~ model 同其他師兄都好得意~ 雖然今日D光奇奇怪怪咁, 不過都影左幾張見得人o既~ 去影會真係唔同層次o既人都見到, DC仔人到DSLR到120單鏡都有, 真係可以學到好多野~



13/11/2004 - [ 六 ]
唉, 病...... again...... 不過算好啦, 只係爆頭痛同發燒, 無流鼻水同嘔...... 唉, 身子越黎越弱, 死期不遠矣......


12/11/2004 - [ 五 ]

家姐由澳洲番左黎~ 佢有成3個月聖誕節假! 勁正~ 佢仲好快手咁已經搵到份 part-time~

 

聽日仲要番學...... BMS 執藥堂, 雖然幾得意, 不過十點鐘, 好似早左D喎......

 

終於買左 digital wallet 啦~ 以後去影 function 唔洗下下問梁偉借lu~ 不過買唔到 ipod 始終有D可惜, 不過唔洗錢有部 ipod mini, 賣左佢就有錢買 digital wallet, 已經好好啦~

 

上網睇到中學學界排球o既成績, 見到鄧鏡波仍然係無乜起色...... 唉, 自從 F.6 果年過左之後, 已經無晒贏波o既本錢...... 唉, 先天不足, 加後天不力, 終於搞到而家呢個地步......

 

今日 joint u mass dance BU 主場, 勁好睇~ 以前覺得跳舞都幾無聊下, 不過入左U睇過幾次 BUDA 跳舞, 睇睇下都覺得佢地D手腳形態幾靚下~ 如果加埋D設計過o既燈光, 一定勁靚, 勁想影~

 

好靚o既野可能好難, 或者根本唔會有機會擁有, 但如果有機會, 只係望多兩眼就已經係一個享受~



11/11/2004 - [ 四 ]

今日先知原來 IT 個網頁係唔可以超過 5 個 html...... shit...... 之前果D草稿可以死晒...... 又要 design 多次, 而且得果五個 page, 好大限制! IT 真係低低地, 又要人做得好, 佢又懶得同你睇, 可惡!!! 不過我係唔會向惡執力低頭ge!!!

 

原來下年o既bio莊已經砌好左~ 效率真係快~ 仲聽講其他好多莊都開始招莊添, 我仲以為係 sa/su 呢D大會先咁早招莊添~ 咁係時候問下攝影學會幾時招莊啦~ 做左莊員應該好多機會識下D professional o既攝影師喲! 實學到好多野~



09/11/2004 - [ 二 ]

今日上第一堂中醫 BMS, 幾得意~ 不過就係諗唔明點解唔可以用一個 microscopic o既角度去睇中藥...... o既然搞得掂個 virus, 咁中藥入面實有D成份可以 kill 個 virus~ 定係其實果隻成份唔係 act on 個 virus, 而係 act on 我地個身體? 兩個 approach 係好唔同, 不過好似都好有發展潛力! 上完 BMS 之後就散得, 因為 2.30pm 開始畢業禮, 唔關我事~ 即刻番屋企瞓覺...... 好攰......

 

IT 個網頁, feel 到好快就可以寫好~~~ good~~~



07/11/2004 - [ 日 ]

今日 joint U bio 3 on 3 籃球比賽, 我地果隊打得唔係咁好, 始終我地夾得唔多, 默契唔係咁好, 搞到好多時都係一打一...... 最後打左4場只係贏得一場...... 不過算啦, 今年我地一齊打多D, 下年再黎過!

 

有D野真係唔洗一次過做好多, 每日只係做少少, keep 住咁做, 一段時間之後個成果就會好大~ 今日明白左~ =.=v

 

搵搵下D素材做個 sall presentation, 發覺日本D美術真係做得好好~ 正!



06/11/2004 - [ 六 ]

今日攝影學會 outing, 大澳~ 原來果度係貓貓大本營~~~ 影左唔少貓貓相~ 而且唔知係唔係果度真係平日都好多遊客, D公公婆婆都唔係好 mind 人影佢地相~ 所以可以影到幾張唔錯o既老人家相~ 想影好耐架啦! 不過反而影唔到好多水上棚屋..... 呢個大澳o既一大特色, 因為對住一條條柱竟然 feel 到唔知點好...... 始終功力未夠呀! 努力吧...... 另外見到人人都有用 zoom 鏡, 得我一個用定焦, 仲要兩支...... 唉...... zoom 鏡, 一係唔買, 一買就勁貴先有見得人質素...... 我支 17-40mm L f/4, 仲要等到暑假先到手呀......

http://www.fotop.net/nicolo/taio

 

開始諗 IT 個 homepage 個 layout, 都係黑白灰啦, 功力未夠, 用唔起其他色...... 不過今次使用白色做主色啦, 黑色唔夠搶, 雖然一路白色睇得耐會唔係咁舒服, 不過俾分果條友都唔會得閒同你慢慢睇啦~ 所以最緊要 eye catching, 簡潔~

 

今晚同聽晚要把握時間搞搞D project 啦~



04/11/2004 - [ 四 ]

過左 mid-term test, 果D project 呀, 考時時間呀開始排山倒海咁殺埋黎啦!

 

SALL presentation (19/11/2004)

IT 兩個 homepage (20/11/2004)

BMS 千字 paper (03/12/2004)

PE exam (09/12/2004)

Eng exam (09/12/2004)

IT exam (13/12/2004)

Micbio exam (14/12/2004)

Biochem exam (16/12/2004)

 

嘩...... 自己 list 番出黎都覺得好恐怖...... 好多野做呀~呀~呀~呀~

 

星期六攝影學會有 outing 啦~ 等左好耐啦~ 又可以一班人一齊去影相啦! 好玩~ 今次去大澳, 想去果度影相好耐啦~ 睇過好多相都影到果度好有風味~ 正喲~

 

今日 follow lab 之後就走左去石埉尾影相~ 果度一路俾我印象就係老人區同屋村~ 咁大個仔都係第一次出石埉尾地鐵站...... 周圍亂咁行, 原來我只係估中左一半, 果度原來仲有好多中學, 不過我諗大部份學生都係住o係其他區, 因為我行入D屋村, 見到o既大部份都係老人家, 而且當我影緊D大廈時, 都不時 feel 到有人望住我, 原來可能因為D唔想出街o既老人家好鍾意o係屋企望出街. 而屋村下面o既鋪頭全部都好六十年代 feel, 士多, 米鋪, 理髮店...... 全部都好舊好舊, 好似番左去細個時見到o既街邊感覺~ 細個果時住西環都有好多呢D鋪頭, 不過而家連西環都所餘無幾lu~ 跟住又入左街市, 果度o既街市係真正香港人街市~ 雜貨鋪特多, 因為好多鋪頭都係賣好多唔同種類o既野, 一間鋪頭賣齊中藥, 生果同罐頭~ 賣衫o既主要都係賣老人衫~ 其實政府成日話要翻新舊區, 但係其實好似石埉尾呢D咁o既舊區根本唔洗政府搞佢, D鋪頭街市自有佢o既生存之道, 而且咁有特色o既野, 拆左又就無架啦......

http://www.fotop.net/nicolo/shekkipmei



02/11/2004 - [ 二 ]

今日拎左 ipod mini 啦~ 不過一上手就俾梁偉領取番屋企啦~ 佢對呢部野愛不釋手咁~ 呵~ 佢買左 ipod mini 就離 D70 遠左lu~~~ 而我就可以買部二手大 ipod 啦~ 再買埋個 card reader, 咁就唔洗買 digital wallet 啦~ 影相就唔洗就住就住咁啦...... 我都唔係投資好多je, 應該最多$1000啦, 當然要時間啦~ 一步步黎啦...... 頂得順 ge......

 

今日 BMS Eric 最後一堂, byebye lu, 真係唔知幾時可以再遇到D咁好o既 lecturer 同科目~ sem 2 聽晚就要 reg 科, 無 elective, 得 rp...... 想讀 introduction to astronomy...... 要等 year 2 lu~

 

今日番屋企時見到塊花瓣由樹上面慢慢跌落黎, 原來佢地係會好似縲絲咁轉落地~ 個姿勢勁靚! 有時候呢D咁靚o既野就算有相機o係手都唔會影到...... 好多人話影相就係要 capture 最美一刻, 但係真正o既最美一刻好多時都係唔覺意咁出現, 然後o係你驚嘆同落寞之間消失...... 就好似暗戀咁...... 即使你之前點準備, 當佢真係出現o既時候你只可以手足無措咁, 呆呆咁睇住...... 呆呆呆呆呆呆呆呆呆呆呆呆呆呆......



01/11/2004 - [ 一 ]

尋晚練完波就去左蘭桂坊影相~ Halloween 呀! 梁偉仲話佢有個 friend 會扮得好激~ 一路周圍行一路影, 十點幾果時勁多人, D人真係玩得好癲~ 將塊面畫到鬼五馬六, 又著到唔三唔四~ 有D好騎呢, 有D好靚~影到十二點左右見人少D就真係上去蘭桂坊影啦~ 梁偉個 friend 都終於出現啦~ 佢地係魔女 feel 喲~ 套衫勁靚~ 仲話係自己整添! 勁爆啦~ 幫佢地係咁搵人一齊影相~ 不過唔知點解我副 con 無啦啦勁乾, 睇野模查查咁...... 完全對唔到焦...... 變左估距對焦...... 無計啦, 照影啦~ 真係見到好多造型, funny~ 影到兩點幾見差唔多夠皮我同梁偉就散先~ 佢兩個 friend 就繼續玩~~~ 番到屋企都唔瞓住, 即刻開 photoshop 睇相~ 哈~ 8成走左焦~ 唔, 雖然今次影得唔係咁好, 但係下次一定要再同佢地影過相呀! 好玩~

 

biochem 而家果D lipid metabolism 深過以前D glucose metabolism 好多~ 不過幾好玩~ D pathway 可以統一埋架~ 勁!

Name
Security code
CAPTCHA Image Reload
Verify security code
Message