尋晚玩到咁夜, 今早就要一早仆起身去朋友屋企做姊妹啦 !  好在住得近, 我以半小時極速就可以扮完靚, 餵埋狗, 洗埋廁就出得門口兼非常之準時就去到新娘既屋企 !

話說呢個朋友係讀書時識既, 由初時眼超超到唔知點解好投契咁就做左朋友咁多年 !  淨係男友都見佢換過幾個~~ 睇住佢同呢個識左7年既老公結婚 ... 有一種好特別既感覺 !  話說大家都係咁上下時間就各自識到新既男友仔 ... 但到左7年後既今日, 我既好朋友就終於嫁得出, 仲搵到一個非常之好既老公, 好錫佢, 仲比到好安穩既生活佢  !  而我就唔好講啦 ...

今日既婚禮都好順利, 而家仲有時間淨, 所以新郎新娘都算叫做有休息既時間, 佢地真係安排得好好, 又照顧周到 !  首先早上接新娘時都好順利, 班兄弟都好聽話合作, 司機又好準時 !  反而係果幾個攝影司就遲到 ... 真係唔識做 !  到接完新娘, 就返去男家屋企斟茶, 完成左之後, 我地就兄弟姊妹就去左食飯, 食完飯, 仲有時間可以返屋企抖返幾個鐘 !  可能因為唔洗去註冊處, 搵律師到左夜晚飲宴時見証, 所以時間真係好好用!  到左4點再去返酒店度換衫同埋安排迎賓同埋回禮既野 !  間酒店房好正呀, 全海景, 攝影司仲用個海景黎做background拎D衫出黎影相, 我估出黎一定好靚, 不過唔知幾時先有得睇o者 !  除左迎賓果陣時悶d同忙d之外, 其他時間都唔算辛苦, 都係執頭執尾咁 !  反而班兄弟就成日唔見左人, 又唔洗做 ... 一食完野完席之後, 連人都消失埋添呀 ... 真係冇義氣 !  最後, 連姊妹都係得返我同Pracilla係度執返晒新娘房d野上房, 上到房仲要Pack up所有野等明早送走 ... 攪攪攪攪攪 ... 就攪到成點幾鐘先有得返屋企 !  好在Uncle搵車車埋我~

總結, 做Dorothy既姊妹真係好嘆 !! 因為所有安排既野都係佢自己做晒, 又服侍埋我地揀衫, 試鞋, 食飯 ... 所有野都係佢包晒, 我地一毫子都冇出過 !  所以, 我都唔會咁衰 ... 一場姊妹除左禮金會大封d, 仲自己比錢整番個頭同去左整指甲 !  到左返屋企點一點算, 開門利是加埋新郎新娘Uncle Autie比既利是, 有成千銀呀 ... 變相係佢地請我地飲咁囉~~